¿Qué é DIH AI4Galicia?

Misión

O Hub de Innovación Dixital AI4GALICIA ten como misión incrementar a competitividade do tecido produtivo de Galicia, mediante o impulso e o uso intensivo da intelixencia artificial (IA) por parte das empresas e outros actores económicos do territorio

Obxectivos específicos

1. Integrar e favorecer a cooperación entre a universidade, centros tecnolóxicos, empresas, industrias, e as súas asociacións, entidades de capital de risco, administracións públicas e outros axentes interesados.
2. Prestar servizos de alto valor engadido no ámbito da I+D, da xestión da innovación e da valorización do coñecemento.
3. Capacitar empresas, profesionais e estudantes en técnicas e solucións relacionadas coa intelixencia artificial.
4. Identificar de xeito activo os retos da industria, o sector público e a sociedade.
5. Favorecer a cooperación nacional e internacional con outros Hubs de Innovación Dixital a través da promoción de proxectos e actuacións conxuntas, a prestación de servizos e o intercambio de coñecemento e boas prácticas

O DIH AI4GALICIA contribúe á implementación da iniciativa europea Digitizing European Industry (DEI), que ten o obxectivo de promover a dixitalización da industria e os servizos afíns en todos os sectores.

Un dos piares desta iniciativa é a creación nas distintas rexións europeas de Digital Innovation Hubs (DIH), centros de innovación dixital onde as empresas –en especial pemes e start-ups– poidan atopar infraestruturas, coñecemento e asesoramento necesarios para incorporar as innovacións dixitais nos seus procesos produtivos.

Así mesmo, o DIH enmárcase na Estratexia europea para a intelixencia artificial, lanzada pola Comisión Europea en abril de 2018.

Esta estratexia evidencia que a intelixencia artificial (IA) se converteu nunha das tecnoloxías clave para incrementar a competitividade de todos os sectores económicos, ata ser considerada a nova tecnoloxía facilitadora clave ao igual que a nanotecnoloxía, a biotecnoloxía ou a fotónica. Por iso é fundamental dispor de instrumentos a nivel nacional e rexional que favorezan a transferencia de coñecemento e a incorporación desta tecnoloxía por parte das empresas.

Recentemente, e aliñada coa Estratexia europea, publicouse a Estratexia española de I+D+i en inteligencia artificial, que establece as prioridades nacionais en materia de IA que serán enmarcadas na nova Estratexia española de ciencia, tecnoloxía e innovación (EECTI) 2021-2028.

Ademais, AI4GALICIA está aliñado coa iniciativa Industria Conectada 4.0 do Goberno español. Entre as liñas mestras deste programa, inclúese a oferta de habilitadores dixitais ás empresas, o apoio a estas para a incorporación destes habilitadores, a transferencia de coñecemento e o desenvolvemento de competencias sobre tecnoloxía dixital para a industria.

AI4GALICIA enmárcase na Estratexia rexional de especialización intelixente de Galicia (RIS3 Galicia); de maneira específica, contribúe ao cumprimento das tres prioridades do seu Reto 2, favorecendo a diversificación da competitividade dos sectores tractores e da industria galega, a través do impulso das TIC como tecnoloxía facilitadora.